| ಹೈಲೈಟ್ಸ್: |
|
ಕನ್ನಡದಲ್ಲಿ ಸಿನಿಮಾ ಎಂದರೆ ಬಜೆಟ್‌ನ ಲೆಕ್ಕಾಚಾರ ಎಂಬಂತಾಗಿದೆ. ಯಶ್ ಅವರ ಟಾಕ್ಸಿಕ್ ಸಿನಿಮಾ 200 ಕೋಟಿ ಬಜೆಟ್‌ನಲ್ಲಿ ಅದ್ದೂರಿಯಾಗಿ ತಯಾರಾಗುತ್ತಿದೆ. ಅದರ ಒಂದು ಹಾಡಿನ ಬಜೆಟ್‌ನಲ್ಲೇ ನೀಮ್ ಕರೋಲಿ ಬಾಬಾ ಅವರ ಜೀವನವನ್ನು ಆಧರಿಸಿದ ‘ಹನುಮಾನ್ ಅಂಶ್ (Hanuman Ansh)’ ದಂತಹ ಮೂರು ಸಿನಿಮಾಗಳನ್ನು ಮಾಡಬಹುದಾಗಿದೆ. ಆದರೆ ದುಡ್ಡಿದ್ದರೆ ಮಾತ್ರ ಒಳ್ಳೆ ಸಿನಿಮಾ ಆಗುತ್ತದೆಯೇ? ಎಂಬುದನ್ನು ಇದೀಗ ಹನುಮಾನ್ ಅಂಶ್ ಸಿನಿಮಾ ತೋರಿಸಿಕೊಟ್ಟಿದೆ.
2 ಕೋಟಿ ಬಜೆಟ್! ಈ ಮೊತ್ತ ಸಿನಿಮಾ ಮಾಡುವವರಿಗೆ ಚಿಕ್ಕದಾಗಿ ಕಾಣಬಹುದು, ಆದರೆ ಅದರಲ್ಲಿರುವ ಪ್ರಾಮಾಣಿಕತೆ ತುಂಬಾ ದೊಡ್ಡದು. ಇಂದು ಕನ್ನಡದಲ್ಲಿ ಬಹಳಷ್ಟು ಸಣ್ಣ ಸಿನಿಮಾಗಳು ಬಂದು ಹೋದಂತೆ ಹೋಗುತ್ತವೆ. ಆದರೆ ಹನುಮಾನ್ ಅಂಶ್ ಆಗಲ್ಲ. ಕಾರಣ, ಈ ಸಿನಿಮಾದಲ್ಲಿ ದುಡ್ಡಿಗಿಂತ ಹೆಚ್ಚಾಗಿ ಮಣ್ಣಿನ ವಾಸನೆಯೊಂದಿಗೆ ನಂಬಿಕೆ ಅಡಗಿದೆ. ಹೌದು! ಹಳ್ಳಿಯ ಒಬ್ಬಾತನಿಗೆ ಹನುಮಂತನ ಭಕ್ತಿ ಹುಟ್ಟುವ ಹಾಗೆ ಆತನ ಶಕ್ತಿ ಬರುವ ಕಥೆಯಾಗಿದೆ. ಈ ಸಿನಿಮಾ ನೋಡುತ್ತಿದ್ದರೆ ನಮ್ಮ ಮನೆಯಲ್ಲಿ ಅಜ್ಜಿ ಹೇಳುವ ಕಥೆಯಂತೆ ತೋರುತ್ತದೆ. VFX ಸ್ವಲ್ಪ ವೀಕ್ ಇದೆ ಎಂಬುದು ನಿಜ, ಆದರೆ ಆ ವೀಕ್ VFX ನಲ್ಲೂ ಒಂದು ಮನಸ್ಸಿದೆ ಎಂದೇ ಹೇಳಬಹುದು.
ಹಾಗೆಂದ ಮಾತ್ರಕ್ಕೆ ಟಾಕ್ಸಿಕ್ ಸಿನಿಮಾವನ್ನು ಟೀಕೆ ಮಾಡುತ್ತಿಲ್ಲ. ಟಾಕ್ಸಿಕ್ ನಮ್ಮ ಕನ್ನಡದ ಹೆಮ್ಮೆ. ಅದು ವಿಶ್ವಮಟ್ಟದಲ್ಲಿ ಕನ್ನಡದ ಭಾಷೆ ಹಿರಿಮೆಯನ್ನು ಎತ್ತಿಹಿಡಿದಿದೆ. ಆದರೆ ಟಾಕ್ಸಿಕ್‌ನಂತಹ ಸಿನಿಮಾಗಳಿಗೆ 200 ಕೋಟಿ ಬೇಕು, 500 ಜನ ಕೆಲಸ ಮಾಡಬೇಕು. ಆದರೆ ಹನುಮಾನ್ ಅಂಶದಂತಹ ಸಿನಿಮಾಗೆ ಬೇಕಿರುವುದು 20 ಜನರ ನಂಬಿಕೆ ಮಾತ್ರ. ಟಾಕ್ಸಿಕ್‌ನಲ್ಲಿ ನೀವು ಹಾಲಿವುಡ್ ಮಟ್ಟದ ಫೈಟ್ ನೋಡಬಹುದು, ಆದರೆ ಹನುಮಾನ್ ಅಂಶ್ ಸಿನಿಮಾದಲ್ಲಿ ನಿಮ್ಮ ಊರಿನ ಜಾತ್ರೆ, ಮಣ್ಣಿನ ಸೊಗಡು, ನಂಬಿಕೆ, ಭಕ್ತಿಯನ್ನು ನೋಡಬಹುದು. ಈ ಕಾರಣದಿಂದಲೇ ಟಾಕ್ಸಿಕ್‌ಗಿಂತ ಒಂದು ಹೆಜ್ಜೆ ಮುಂದೆ ಇದೆ ಎನ್ನಬಹುದು. ಏಕೆಂದರೆ ಟಾಕ್ಸಿಕ್ ನೋಡಿ ಜನ ವಾವ್ ಎಂದರೆ, ಹನುಮಾನ್ ಅಂಶ್ (Hanuman Ansh) ಸಿನಿಮಾ ನೋಡಿದ ಜನ ಜೈ ಶ್ರೀರಾಮ್ ಎನ್ನುತ್ತಾರೆ. ವಾವ್ ಎಂಬ ಪದ ಒಂದು ದಿನ ಅಥವಾ ಸಿನಿಮಾದ ಹಿರೋ ಮೇಲಿನ ಪ್ರೀತಿಗೆ ಸೀಮಿತವಾದರೆ, ಭಕ್ತಿ, ನಂಬಿಕೆ ಜೀವನ ಪೂರ್ತಿ ಸಾಗುತ್ತದೆ.
Hanuman Ansh: 5 ಕೋಟಿ ಲಾಭದ ಲೆಕ್ಕಾಚಾರ ಸುಳ್ಳು: ಏನಿದು?
ಇನ್ನೂ 5 ಕೋಟಿ ಲಾಭದ ವಿಚಾರಕ್ಕೆ ಬಂದರೆ, ಸಾಕಷ್ಟು ಜನ ಈ ಸಿನಿಮಾಕ್ಕೆ ಇಷ್ಟೊಂದು ಲಾಭವಾಗಿರೋದೆ ಸುಳ್ಳು ಎನ್ನುತ್ತಿದ್ದಾರೆ. ಆದರೆ ಇದು ಸುಳ್ಳಲ್ಲ, ಇದು ಹೊಸ ಬಿಸಿನೆಸ್ ಮಾದರಿ. ಹಿಂದೆ ಸಿನಿಮಾ ಗೆಲ್ಲುವುದು ಥಿಯೇಟರ್‌ಗೆ ಮಾತ್ರ ಸೀಮಿತವಾಗಿತ್ತು. ಇದೀಗ ಸಿನಿಮಾ ಗೆಲ್ಲುವುದು ಫೋನ್‌ನಲ್ಲಿ.
ಹೌದು! ಹನುಮಾನ್ ಅಂಶ್ ಥಿಯೇಟರ್‌ನಲ್ಲಿ 70-80 ಲಕ್ಷ ಮಾಡಿರಬಹುದು. ಆದರೆ ಅದೇ ಸಿನಿಮಾ ಹಿಂದಿಗೆ ಡಬ್ ಆಗಿ ಯೂಟ್ಯೂಬ್‌ನಲ್ಲಿ, OTTಯಲ್ಲಿ 40 ಲಕ್ಷ ಜನರ ವೀಕ್ಷಣೆ ಪಡೆದುಕೊಂಡಿದೆ. ಒಬ್ಬೊಬ್ಬರಿಂದ 10 ರೂಪಾಯಿ ಬಂದರೂ 4 ಕೋಟಿ ಆಯಿತು. ಇದನ್ನು ಲಾಭ ಎಂದು ಕರೆಯಬಾರದೇ? ದೊಡ್ಡ ಸಿನಿಮಾಗಳು ಥಿಯೇಟರ್‌ನಿಂದ ಮಾತ್ರ ದುಡ್ಡು ಮಾಡುತ್ತವೆ, ಸಣ್ಣ ಸಿನಿಮಾಗಳು ಎಲ್ಲಾ ಕಡೆಯಿಂದ ದುಡ್ಡು ಮಾಡುತ್ತವೆ. ಹನುಮಾನ್ ಅಂಶ್ (Hanuman Ansh) ಸಿನಿಮಾದ ಈ ಹೊಸ ದಾರಿ ಇದೀಗ ತೆರೆಮರೆಯಲ್ಲಿ ಸಿನಿಮಾ ರೂಪಿಸುತ್ತಿರುವ ಸಾವಿರಾರು ನಿರ್ದೇಶಕರಿಗೆ ಮಾದರಿಯಾಗಿದೆ.
ಸಿನಿಮಾದ ಹೀರೋ ಹೊಸಬರಾದರೂ ಅವರ ಕಣ್ಣಲ್ಲಿ ಭಕ್ತಿ ಕಾಣುತ್ತಿದೆ. ಟಾಕ್ಸಿಕ್‌ನಲ್ಲಿ ಯಶ್ ಅವರ ಕಣ್ಣಲ್ಲಿ ಕೋಪ ಕಂಡರೆ, ಅದು ಮಾಸ್‌ಗೆ ಇಷ್ಟ. ಆದರೆ ಹನುಮಾನ್ ಅಂಶ್ ಸಿನಿಮಾದ ಹೀರೋ ಕಣ್ಣಲ್ಲಿ ಶಾಂತಿ ಇದೆ, ಅದು ಫ್ಯಾಮಿಲಿಗೆ ಇಷ್ಟವಾಗುತ್ತಿದೆ. ಇಡೀ ಕುಟುಂಬ ಕೂತು ನೋಡುವಂತಹ ಸಿನಿಮಾ ಇದು. ಅಶ್ಲೀಲತೆ ಇಲ್ಲ, ಡಬಲ್ ಮೀನಿಂಗ್ ಡೈಲಾಗ್ ಇಲ್ಲ. ಕೇವಲ ಭಕ್ತಿ ಇದೆ.
ಬಿಲ್ಡಪ್ ಇಲ್ಲದ ಸಿಂಪಲ್ ಕಥೆ: Hanuman Ansh
ಇನ್ನೂ ಟಾಕ್ಸಿಕ್ (Toxic) ವಿಚಾರಕ್ಕೆ ಬಂದರೆ, ಅಲ್ಲಿ ಕಥೆಗಿಂತ ಬಿಲ್ಡಪ್ ಜಾಸ್ತಿ ಇದೆ. 200 ಕೋಟಿಯಲ್ಲಿ 150 ಕೋಟಿ ಬಿಲ್ಡಪ್‌ಗೇ ಖರ್ಚಾಗುತ್ತದೆ. ಆದರೆ ಹನುಮಾನ್ ಅಂಶದಲ್ಲಿ 2 ಕೋಟಿಯಲ್ಲಿ 2 ಕೋಟಿಯೂ ಕಥೆಗೇ ಖರ್ಚಾಗಿದೆ. ಅದಕ್ಕೆ ಈ ಸಿನಿಮಾ ಜನರಿಗೆ ಹತ್ತಿರವಾಗಿದೆ. ಕನ್ನಡಕ್ಕೆ ಟಾಕ್ಸಿಕ್‌ನಂತಹ 200 ಕೋಟಿ ಸಿನಿಮಾಗಳು ಬೇಕು, ಅದು ನಮ್ಮ ಮಾರುಕಟ್ಟೆಯನ್ನು ದೊಡ್ಡದು ಮಾಡುತ್ತದೆ. ಆದರೆ ಅದಕ್ಕಿಂತ ಹೆಚ್ಚಾಗಿ ಹನುಮಾನ್ ಅಂಶ್ (Hanuman Ansh) ದಂತಹ 2 ಕೋಟಿ ಸಿನಿಮಾಗಳು ಕೂಡ ಬೇಕು, ಅದು ನಮ್ಮ ನಂಬಿಕೆಯನ್ನು ಉಳಿಸುತ್ತದೆ. 2 ಕೋಟಿ ಹಾಕಿ 5 ಕೋಟಿ ಗಳಿಸಿದ್ದು ನಿಜವೋ ಸುಳ್ಳೋ ಗೊತ್ತಿಲ್ಲ, ಆದರೆ 2 ಕೋಟಿಯಲ್ಲಿ ಕನ್ನಡದ ಮನಸ್ಸನ್ನು ಗೆದ್ದಿದ್ದು ಮಾತ್ರ ಶೇ.100 ರಷ್ಟು ನಿಜವೆಂದೇ ಹೇಳಬಹುದು.
ಒಟ್ಟಾರೆಯಾಗಿ ಸಣ್ಣ ಸಣ್ಣ ಸಿನಿಮಾಗಳು ಬೆಳೆಯಬೇಕು, ಆದರೆ ಸುಳ್ಳು ಕಲೆಕ್ಷನ್ ಹೇಳಿಕೊಂಡು ಅಲ್ಲ. ನಿಜವಾದ ಕಲೆಕ್ಷನ್ ಹೇಳಿದರೆ ಮುಂದಿನ ನಿರ್ಮಾಪಕರಿಗೆ ಅನುಕೂಲವಾಗುತ್ತದೆ. ಇಲ್ಲದಿದ್ದರೆ 2 ಕೋಟಿ ಹಾಕಿದರೆ 5 ಕೋಟಿ ಬರುತ್ತದೆ ಎಂದು ನಂಬಿ ಬಂದು ಇನ್ನೊಬ್ಬರು ದುಡ್ಡು ಕಳೆದುಕೊಳ್ಳುತ್ತಾರೆ. ಚಿತ್ರತಂಡ ಪಾರದರ್ಶಕವಾಗಿ ನಿಜವಾದ ಲೆಕ್ಕ ಕೊಡಬೇಕು ಎಂಬುದು ಸಿನಿಪ್ರಿಯರ ಅಭಿಪ್ರಾಯವಾಗಿದೆ.
[…] […]